Naaman Manli

Posnal infamieshan

Baan: 4 July 1893
Ded: 2 Septemba 1969
Nashinaliti: Jumiekan

Profeshnal infamieshan

Profeshan: laaya, palitishan, lejislieta
Muuvment: Piipl Nashinal Paati, Wes Indiz Fedarieshan

Naaman Washintan Manli ar Norman Washington Manley MM, QC, Nashinal Iiro a Jumieka (4 Julai 1893 – 2 Septemba 1969), wena Jumiekan stietsman. Wah Ruodz Skala, Manli eh-bikomps wan a Jumieka liidn laaya ina di 1920z. Manli wena advoket a yunivoersal sofrij, we eh-grant bai di British koluonial gobanment tu di kalani ina 1944.

Tugiada wid Azman Fierklof (Osmond Fairclough), di bredadem Frangk ah Ken Il (Frank and Ken Hill), Edli P. Jiekobz (Hedley P. Jacobs, nuo bai ih inishal H.P. Jiekobz) a soh ada wandem, ina 1938 ih foun di Piipl Nashinal Paati we lieta weh tai tu di Chried Yuunian Kanggres (Trade Union Congress,TUC) ah iibm lieta tu di Nashinal Woka Yuunian (National Workers Union, NWU). Ih liid di PNP ina ebri ilekshan frah 1944 tu 1967. Deh efat rizolt ina di Nyuu Kanstityuushan a 1944, we grant ful adolt sofrij.

Manli saab az di kalani Chiif Minista frah 1955 tu 1959, ah az Primier frah 1959 tu 1962. Ih wena propuonent a self-gobanment bot eh-poswied fi jain nain ada British kalani ina di Kiaribiyan terichri ina di Fedarieshan a di Wes Indiz bot ih kaal refarendom pah di ishu ina 1961. Di vuotadem chuuz fi mek Jumieka witjraa frah di yuunian. Manli den ap fi kaal jinaral ilekshan iibm duo ih faib-ier mandiet eh bieli aafwe chuu. Ih laas di ilekshan tu ih kozn Aligzanda Bostamanti a di Jumieka Lieba Paati we liid di konchri tu Indipendans.

Bayagrafi

Naman Washinton Manli eh-baan tu mix-ries pierans ina Raxboro ina Manchesta Parish, Jumieka. Ih faada T.A.S. Manli wena sumaal-biznizman ah di son a wah chrieda uu eh-maigriet frah Yaaksha, Ingglan (Yorkshire , England); ih mada, Maagrit Shiera (Margaret Shearer), wena di daata a wah mix-ries uman ah ar Airish ozban, wah pen-kipa.^[1]

Manli wena briliant skala, suoja ah atliit, ah weh-stodi laa a Jiizas Kalij, Axfad az Ruodz Skala. Ih saab ina di Rayal Fiil Aatilari juurin Wol Waar I, ah weh-awaad di Militeri Medal (M.M.).

Juu tu resprichri ilnis, Manli ritaya frah palitix pah ih boertdie ina 1969. Ih ded lieta da ier de, pah 2 Septemba 1969. Ih tuum eh-dizain bai di kritikali akliem Jumiekan skolpta, Kristifa Ganzaaliz (Christopher Gonzalez).^[2]

Posnal laif

Az yongman, ih marid ih kozn Edna Suidinbangk (Edna Swithinbank, 1 March 1900 – 2 February 1987) ina 1921. Deh eh-ab tuu pitni tugiada. Deh sekan son, Maikal Manli (Michael Manley), go ina palitix tu ah raizop fi ton di fuot Praim Minista a Jumieka. Di uola son, Doglas Manli (Douglas Manley), eh-bikomps wah yunivoersiti lekchara, palitishan ah gobament minista.

Manli wena memba a Alpha Phi Alpha fratoerniti. Manli spiich intaikl, Fi Yunait ina Kaman Bakl (To Unite in a Common Battle) eh-diliva ina 1945 a di fratoerniti Toti-fos Jinaral Kanvenshan ina Chikaago, Ilinai. [1] Archived 2007-09-29 at the Wayback Machine

Legisi ah hanaz

Shaatli bifuo ih det, Manli ah Bostamanti weh prokliem Nashinal Iiro a Jumieka, fi jain blak nashinalis Maakos Gyaavi (Marcus Garvey), naintiint-senchri iiro Paal Buogl (Paul Bogle), ah naintiint-senchri palitishan Jaaj Wiliam Gaadn (George William Gordon).

Refrans

↑ Ranston (1999), p. 14
↑ Jamaican artist Christopher Gonzalez dies. In: Associated Press, Boston Globe, 4 August 2008. Abgerufen am 9 August 2008.

Bibliografi

Ranston, Jackie, Lawyer Manley: Vol. 1 First Time Up, University of the West Indies Press, 1999, ISBN 976-640-082-2

Extoernal lingk

Norman Manley at Find A Grave

[1] Ranston (1999), p. 14

[bg-2] Jamaican artist Christopher Gonzalez dies. In: Associated Press, Boston Globe, 4 August 2008. Abgerufen am 9 August 2008.

[1]

[2]