Kiaribiyan
Di Kiaribiyan a di riijan we kansis a di Kiaribiyan Sii, di ailandem we dede (muos a we soroun bai di sii), ah aal di kuos we sorouni. Di riijan de tu di soutiis a di Golf a Mexiko, ah Naat Amoerka, iis a Senchral Amoerka, ah tu di naat a Sout Amoerka.
Isidong muosli pah di Kiaribiyan Pliet, ah di riijan ab muo dah 7,000 ailan, ailet, riif, ah kie. Di ailandem, we piipl kaal di Wes Indiz, jinarali faam wah ailan aak we maak aaf di iistan ah di nadan ej a di Kiaribiyan Sii. Deh kaal di ailan dem di Wes Indiz, kaa chuu wen Krixtifa Kolombos lan ya ina 1492 ih weh tingk se ih weh riich di Indiz we de ina Ieja.
Di riijan kansis a di Antiliiz, we divaidop ina di Grieta Antiliiz we maak aaf di sii pan di naat, ah di Lesa Antiliiz pah di sout ah di iis, ah di Ba’aamaz, we az a mata a fak de ina di Atlantik Uoshan naat frah Kyuuba; ino de ina di Kiaribiyan Sii ataal. Siem wie, Gayana ina Sout Amoerka ah Biliiz ina Senchral Amoerka aidentifai az Kiaribiyan chuu simila ischri a British kalanaizieshan. Aal di edkwaataz fi di riijanal badi Kiarikom (Caricom) de a Jaajtong, Gayana.
Jiapalitikli, di Wes Indiz kansida az wah sob-riijan a Naat Amoerka, an i aaganaiz ina 27 terichri hingkluudn soh savrin stiet, uobasiiz stiet, uobasiiz dipaatment, ah dipendansi. Wantaim, som a di ailan kom tigeda ina di Wes Indiz Fedarieshan, we eh mekop frah ten a di Ingglish-taakin terichri, bot ineba laas lang. Demde taim de, di wuola di terichridem wena British kalani.
Di riijan niem aafa di Kiarib piipl, wah etnik gruup we weh de ina di Lesa Antiliiz ah som paat a Sout Amoerka, wen di Yuropiyandem fos kom.